عالم سوري يكشف عن "مصائب" في وزارة الزراعة السورية أخطر من قانون قيصر الأمريكي
29.05.2020
كشف الدكتور والباحث أمجد حسن بدران عن تصرفات مدمرة للإنتاج الزراعي السوري وأكد أن إنتاج البذار على المستوى المحلي ضعيف جدا والصدليات الزراعية مليئة بالبذار المستوردة، وقال إن "التوصية السمادية الفاشلة الخاطئة إملائياً وحسابياً وعلمياً" قد تكفي لدخول البعض للسجن!!.
وطالب الدكتور بدران بإقالة وزير الزراعة السوري لأنه لم يتخذ إجراءات اتجاه بعض القضايا الأساسية بالنسبة للزراعة السورية. ولفت إلى أن هذا التقصير يضر بالإنتاج الزراعي السوري (ومن المعروف أن تراجع الانتاج أو عدم ازدياده سيضر سوريا كثيرا وسيضعف العملة السورية).
وأشار بدران إلى أن صفحة هيئة البحوث على فيسبوك حظرت عدد من الدكاترة الباحثين والمهندسين وأكثرهم أوائل على كلياتهم خوفاً من تعليقاتهم التي تنقد.
وجاء في مقال الدكتور بدران:
نصيحة إدارية وعلمية بعد صباح الخير أقدمها كدكتور باحث للسيد وزير الزراعة أحمد القادري:
لما بدي روح اتفقد عمل مؤسسة بوزارتي كالبحوث متل ماعملت سيادتك مبارح.. شو بعمل؟! بكل بساطة معاليك:
ليتك ذهبت إلى المكان الذي تظهر به نتائج عملهم... مابدها الشغلة!!
عمل هيئة البحوث يظهر عند:
الصيدلي الزراعي.... الفلاح.... التاجر... المستهلك ...
لأن إذا رحت معاليك على المؤسسة وأخدوك على بيت بلاستيكي مزروع خضار وقالولك: هذه تجارب الخضار حتى نعمل بذار ونوفر قطع أجنبي بدل استيراد البذار!!! فهذا لايعني نهائياً:
انهم عم يشتغلو!!! .. لأنك لو رحت السنة الماضية وقبلها وقبلها وقبلها......الخ قبلها
ولو رحت السنة الجاية وبعدها وبعدها .... الخ بعدها ؟؟؟ رح ياخدوك على بيت بلاستيكي ويقلولك نفس الكلام!!!!!!
طيب والبذار؟! انت شفتو... أنا شفتو... حدا بالدنيا شافو!!! منافس هالبذار؟ عم يشتروه الفلاحين ويرغبولو؟
فشو بعمل كوزير:
بروح لعند أي صيدلية زراعية ومو وحدة بل بروح لعند ألف صيدلية بسوريا باللاذقية بطرطوس بالشام بحمص بدرعا بالحسكة...الخ وبقلو لصاحبها:
وك ابني اعطيني بدي اشتري بذار بندورة أو فليفلة أو كوسا أو خيار أو باذنجان أو فاصولياء...الخ من إنتاج هيئة البحوث ومؤسسة إكثار البذار أنا مابدي لابذار مستورد ولامهرب؟ بدي شغل بلدي ومؤسساتي؟
فرح يجاوبك الصيدلاني يا معالي الوزير: انو والله من عشرين سنة وأكتر مابيلتقى طلبك!!! ماعندي ياسيادة الوزير ولابذرة خضار من إنتاج وزارتك وماعندي ولا بذرة بتحقق طلبك وكل اللي عندي تهريب "بدك تحبسني احبسني" أو مستورد...!!!
عرفت معاليك كيف بتكشف إذا عم يشتغلو البحوث وصادقين معك ولا: لا...
هيك بهالبساطة:
لابرد على الدكتور أمجد ووثائقه مع أنها دامغة وأرقامها موثقة ولابرد عالألف مقال اللي كتبهم بالرقم والمرجع بس كمان: ولا برد على كل مدراء البحوث.... إنما:
بروح أنا كوزير برد عالواقع.... بروح عالصيدلية وبسأل.... وصدقني: الجواب: صفر ورح يضحك تبع الصيدلية...
بدك تابع كلام معاليك عوضع السماد والمبيد (رح يقلك الصيدلاني نفس الحكي: ماعندي تركيبات من البحوث الزراعية: صفر... صفر... صفر)
وبدك تابع عالتوصية السمادية الفاشلة الخاطئة إملائياً وحسابياً وعلمياً والتي قد تكفي لدخول البعض للسجن!!
وبدك كمل على توصية الري اللي مابعرف فلاح بكل سوريا بيشتغل فيها
وبدك كمل على الأدوية البيطرية اللي متلها متل السماد والمبيد والبذار!!!
وأسعار الخضراوات التي ابتلعت الناس ورواتبهم حتى دكاترة ومهندسين في البحوث تأففوا من الغلاء وهم مسؤولون عنه لكنه: طالهم...
وكذا ضبط الجودة (كل سنة مدراء البحوث بيقلولك بدنا نعمل ضبط جودة!! عشرين سنة نفس الكلمة)
ومعاليك فيك بس تقلهن: بدي راجع الفواتير تبع لجان الشراء المخزية والعقود...الخ
أرقام القمح والفروقات 300% صارت عندك معالي الوزير ووضع الشوندر والذرة عندك: مافيك تقول ماوصلتني التفصيلات!!!
والنبي مليت... والنبي تلفت... والنبي تعبتوني رغم الحقيقة والفشل الذريع جداُ جداً جداً واضح للكل!!
وشهودي: الفلاح والتاجر والمستهلك (والله عم يسبوا علينا معاليك بترضاها!!!)... وشهودي دكاترة ومهندسين أكفاء كثر تم مصادرة حتى حقهم بالكلام!!
شغلة أخيرة:
مدراء البحوث لم "ينقذوا" أجهزة البحوث من دوما!!! ولم يشتبكوا مع جيش الإسلام: "الله وكيلك معاليك أنا وعناصري اللي اشتبكنا مو هنن!! وزهران علوش وبويضاتي وأبو صبحي طه وأبو خالد الدقر وقهد الكردي وعلي عفوف كانوا حاطين اسمي واسماء رفقاتي الضباط وحتى أسماء مغاويرنا على قوائمهم للقتل ولم يكن على قوائمهم أي مدير في البحوث الزراعية ومع هيك:
لا أدعي وأنا قائد مداهمة في الحرس الجمهوري أني أنقذت الأجهزة!!! وللأمانة الإرهابيون لم يهتموا بكثير من الأجهزة!!!" شو هي الكلمة اللي مصرين عليها:
"إنقاذ"
هم فقط: "جابوها" بعد أن رحل الإرهابيون وأمناها كجيش... بكل بساطة: راحوا حملوها وجابوها وين الإنقاذ بالموضوع؟! وفيه عالم بتقلك: يوجد تجاوزات أثناء جلب الأجهزة لا أزال أجمع معطياتها!!!
معاليك وعالبيعة: هل تعلم أن صفحة هيئة البحوث حظرت عدد من الدكاترة الباحثين والمهندسين وأكثرهم أوائل على كلياتهم خوفاً من تعليقاتهم التي تنقد؟!!
وسامحني سيادة الوزير على الصعيد الشخصي وبطلوا تحولوا كل أمر "لأمر شخصي"!! ولكن سأتكلم بمناقبية:
لازلت أعتبر أن الخطأ الإداري والعلمي في وزارة الزراعة والذي انعكس على المواطنين غلاء وقلة وتعب وجوع وخجل من ولادهم.... هو خطؤك أنت وأطالب:
بإقالتك...
لأنك: لم تتخذ إجراء!!!...
